Instagram
Whatsapp

OCOI Kurukh Poem Competition
1st Position



कुँड़ुख़ कत्थ डंडी (सोयो डंडी - कविता )
          
******************************************                     नीन कुँड़ख़य र 'अदय एन्न
---------------------------------------------------------------------
           
नीन तलदय मानिम कुँड़ख़य
पहें बलदय तंग'आ कत्थन ,
र-ई अयंग कत्था एन्ने दव
पहें नखरदय नंनर ही कत्थन ,
नीन कुँड़ख़य र'अदय एन्ने ।
र-ई एन्ने दव कुँड़ुख़ कत्था
पहें मलदव लग्गी निंग्गा ,
महबा नन्दय नंनर ही कत्थन
ख़ाड़दय नीन अयंग कत्थन
नीन कुँड़ख़य रअदय एन्ने ।
       
र-ई अयंग कत्था नू रासी एम्बा
नीन मल चखदय ए-रदय सेब्बा ,
चखदय ए-रदय नीन नन्ना कत्थन
रासी ख़खदय मोख़दय नन्ना कत्थन ,
नीन कुँड़ख़य र-अदय एन्ने ।
                                          
र-ई कुँड़ुख़ कत्था ही तोलोंग सिकि ए-ख़ हूँ
मा टूड़दय-बचदय ई तोलोंग सिकि ए-ख़ नू ,
नीन टूड़दय-बचदय नन्ना ए-ख़ नू
टूड़दय-बचदय देवनागरी ए-ख़ नू ,
नीन कुँड़ख़य र'अदय एन्ने ।
           
नीनिम गा अयंग कत्थन
घोखदय-बुझरदय मलदव ,
नन्दय निंगती तरकूटी
एन्देर तेंगोय तंग'आ खूटीन ,
नीन कुँड़ख़य र'अदय एन्ने ।
                                      
र-ई कुँड़ुख़ खोड़हा जोगे
अकय दव-दव डंडी रागे ,
मा पाड़दय-बेचदय रीझती
नन्ना कत्थ डंडी तोकदय रीझती ,
नीन कुँड़ख़य र'अदय एन्ने ।
        
ई राजी तली कुँड़ख़र ही
पहें महबा मल्ला कुँड़ख़र ही ,
मल्ला कुँड़ख़र ही दिम महबा
तो मनो एकासे कुँड़ुख़ कत्था ,
नीन कुँड़ख़य र'अदय एन्ने ।
                                    
मा मनी निंगती कुँड़ुख़ कत्थ महबा
नीनिम गा ख़ाड़दय-तुप्पदय कुँड़ख़ कत्थन ,
नीनिम तुप्पोय होले मनो एकासे महबा
मनो महबा ननोय होले कत्थन लोला ,
नीन कुँड़ख़य र'अदय एन्ने ।
     
बरा कम'आ कुँड़ुख़ राजी
अयंग कत्था बच्छाब'आ की ,
अमा तुप्पा निंग अयंग कत्थन
अयंग कत्थन नना लोला-चोन्हाँ ,
नीन कुँड़थ़य मा र'ओय एन्ने ।
                                       
निजड़ना घोखना चाड़ र-ई
अयंग कत्था ख़ोजना र-ई ,
कोहाँ नलख नन्ना चाड़ र-ई
अयंग कत्था बच्छाब'अना र-ई ,
नीन कु़ँड़ख़य मा र'ओय एन्ने ।
     
एजरना चो'अना चाड़ र-ई
अयंग कत्था कच्छनखरना र-ई ,
अयंग कत्था बीड़ना र-ई
अयंग कत्था परदना र-ई
नीन कुँड़ख़य मा र'ओय एन्ने ।
नीन अयंग कत्थन ननोय लोला
अयंग कत्था निंगन ननो लोला ,
परदो मानिम अयंग कत्था हूँ
महबा मनो तानिम अयंग कत्था हूँ ,
नीन कुँड़ख़य मा र'ओय एन्ने ।
मनो अयंग कत्था ही महबा
मनो कुँड़ुख़ खोड़हा ही महबा ,
अयंग कत्था ही मनो महबा
मनो निंग्हय हूँ महबा ,
नीन कुँड़ख़य मा र'ओय एन्ने ।
चो'आ एजर'आ चांड़े निजड़ा
काना र-ई गोहला उईया ,
मरचा र-ई अयंग कत्थ टोंका
उईना-ख़ोतना कमना र-ई उपजा टोंका ,
नीन  कुँड़ख़य मा र'ओय एन्ने ।
कत्था बिहनी चांख़ना र-ई
बक पूँप पूँइदत'अना र-ई ,
भाखा ख़ंजपा ख़ंजत'अना र-ई
ख़ोयना-ख़चन मंखना र-ई
भाखा ख़ुरजी ख़ोजना र-ई ,
नीन कुँड़ख़य मा र'ओय एन्ने ।
अयंग कत्था धनी मनो
कुँड़ुख़ कत्थ साहित्य धनी मनो ,
कुँड़ुख़ खोड़हा धनी मनो
मानिम मनोय नीन कुँड़ख़य धनी ,
नीन कुँड़ख़य मा र'ओय एन्ने ।।




संतोष तिग्गा 
गुमला, झारखण्ड