कुंड़ुख कविता / कुंंड़ुख डण्डी
-------- बासुदेव राम खलखो।
एरा भईरो मेना बहिनरो,अकय सुंदर रई नमहय कुंड़ुख भाखा ।
इत्तु होरमत बरा कछनखर'ऒत,हुरमी बेड़ा नाम उल्ला माखा।।
(१)
नमहय पुरखार सौसे राजी नु, दवले उज्जा-बिज्जा लगीयर ।
कुंड़ुख नुम नखरार कुंड़ुख भाखा कमचर और नमागे चिच्चर ।
तमहय चिच्चका अयंग भाखान, नाम परद'ओत कसम मोखा।
एरा भईरो ...भाखा । इत्तु होरमत ...माखा ।।
(२)
नन्ना एकअम भाखा नु एन्ने महबा गा मेना गे मला खक्खर'ई ।
अमखीन इरतना मन्डीन खाटना आसमन मेक्खना बअ्तार'ई।
कुंड़ुख भाखा नु बिता'अना गी एरा नन्ना-नन्ना शब्द रई लेक्खा।
एरा भईरो ...भाखा। इत्तु होरमत ...माखा।।
(३)
एन्देर गे इन्ना नाम तंगआ अयोन अयो मला बआ लगदत।
खोंखा-खोंखा भोंगदत नन्नर गे नाम दुलर अयो बआ लगदत ।।
एनन्नेम नुम नाम एरके उन्दुल मानी मोखोत कालोत धोखा ।
एरा भईरो...भाखा । इत्तु होरमत...माखा ।।
(४)
कैरियर गी नामे ती तंगआ खद्दारीन नन्ना भाखा सिखबआ लगदत।
कुंड़ुख भाखा मुन्जुरो होले जाति नमहय डुबरो इ कत्थन मला घोखदत।
खेओ हुं कालो होले हुं मला पाड़ो नन्नर गी डण्डी ओड़ा खाखा
एरा भईरो...भाखा। इत्तु होरमत...माखा।।
(५)
सूर्रा अगर कछनखरओत हुरमी बेड़ा नाम उड़िया बंगला हिन्दी।
होले मानीम मनो कालो उन्दुल नमहय कुंड़ुख भाखाद चिन्दी।।
मेना हरो कुंड़ुखर मानी कत्थद गा लग्गी काली अजम खड़खा
एरा भईरो... भाखा । इत्तु होरमत... माखा।।
(६)
कूल गा उड़द'आ लगी सौसे राजी नु एड़ा अड्डो मनखा अल्ला।
उज्जा-बिज्जागे खतिर तंगआ भाखान उन्दुल हुं अम्बीया मला
नाम एरा कुंड़ुखत जीव जन्तुन ती हुं मन्जकत केरकत खोंखा।
एरा भईरो मेना बहिनरो,अकय सुंदर रई नमहय कुंड़ुख भाखा ।
इत्तु होरमत बरा कछनखर'ऒत,हुरमी बेड़ा नाम उल्ला माखा।।
।।। ------- मुन्जुरा ------ ।।।
---------------------------------------------------------------------
सय बासुदेव राम खलखो
बन्डामुण्डा ,राउरकेला,
सुंदरगढ़, ओडिशा, भारत
0 Comments