KURUKH POEM

संग्गे उज्जना ही तुंग्गुल

                     (1)
जुदा मनर की हुं,
एंगहय दिल निंग्गानिम घोख'ई,
एंगहय जिया निंग्गानिम सोच'ई,
आसिन एंवदा बग्गे सोचदन,
आ बग्गे आस हुं एंग्गन सोचदस का? 
मेंरख़ा मइया ता मोंख़ारो बदरी ही बेचैनी
चे:प ही रुपे नू कोंहां कोंहां बूंदा,
रसे-रसे ख़ेख़ेल ता धूलि नू किदगी,
चेप ही बूंदा गा मल्ला एंगहय गूसन,
एंगहय गल्ले ती चुरख़ना
ई टिपा-टिपा ख़ंजलख़ो नू नीनिम र'अदय,
मेना नी, ख़ंजलख़ो एंगहय ए:रोय
होले किर्रोय का नीन?

                   (2)
याद बार'ई, नमहय संग्गे-संग्गे बिता बाचका आबड़ा बेड़ा
आउर नंजका अबड़ा झूठा वादा,
चो'अनुम-ओक्कनुम ईरका सपेना,
एंगहय याद बार'ई, अबड़ा पियार ही
इज़हार नंजका कत्था,
नीन मेंजकय ती हूं माल मेन्ना भेसेरकय
एंगहय दिल ता कत्थान,
एंगहय टुटुरका-धासेरका उर्मी सपेनान ए:रोय होले
अन्नु नीन आउर नीनिम र'दय,
मेना नी, जीया ता नुंजनान मेनोय
होले किर्रोय का नीन?

                       (3)
हां एन आख़दन,
एन निंगहय ज़िन्दगी ता किताब ही,
ओंटा आतख़ा एकला हेकदन,
नीन ओंटा दफा चलख़र की ए:रा माल बेद्ददय,
आतख़ा ओंटा पढ़ना गा गेच्छा ता कत्था हेके,
पांहे आख़'अलगय, नाम नमहय जिंदगी ता किताब
एन्ने बड़ियर ती लिखिचकादत का
ईन्ना का ने:ला का नेलबेंजा हूं मिटाब'आ पोल्लोत,
एंगहय उर्मी नूं नीन आउर नीनिम र'अदय,
मेना नी, एंगहय जीयाता ई कत्थडण्डी मेनोय
होले किर्रोय का नीन?

~ Prerita Toppo
NAGAON, ASSAM