KURUKH POEM 

         एन असम ता कुंड़ुख़ान

*******************************

एन असम ता कुंड़ुख़ान
एंगहय देसनुम एंग्गन मल चिन्नर,
एंगहय राजीनुम एंग्गन बलनर,
एन एकासे तेंग्गन, एकासे तिखिड़'ओन,
एन असम ता कुंड़ुख़ान।।

असम गे एन्देर माल चिच्चकन,
ई राजी गे एन्देर माल नंजकन,
निमन मेनत'अलगदन, बारा मेना ।।

चाबुवा नूं चाय ख़ोप्पा ईद'ओ बीरि,
एन एंगहय सांवसे सावंग ती,
ख़ेंवचागे पोलना बेसे
कोंहां-कोंहां मन्नन टिड्डकन,
मन्न ही मोड़ान चड्डकन,
टाका-टुकून, टुंगरिन, भदड़ान, पारता ढेरेंगान
झुरनी कान्तो ती झोड़कन,
गड्डी-डीप्पान टोगं'ए-कुड्डी ती सम नन्जकन,
टोंकान-ख़ल्लान चाय ईदना जोगे कमचकन,
कपड़ेता एंरचका आम्मान लिण्डी नूं चिंचिरकन,
अरा सुन्दर हरीयार सोना असम कमचकन।।‌

उल्लान उल्ला मल सोच्चकन,
मा:ख़ान मा:ख़ा माल घोखोचकन,
एंगहय ख़द्द-ख़र्रीन फिकिर माल नन्जकन,
एंगहय उरमिन चिच्चकन,
एंगहय ख़ेस अरा आहड़ा
चाय ख़ोप्पा ही मूली नूं र'ई,
एंगहय ख़ोचोल चाय बगान ता नाला नूं र'ई,
एंगहय ख़द्द-ख़र्रार मंगरी उरांव अरा बन्घना उरांव
काया नूं जीया र'अना गुटी गोरार संग्गे लड़चर,
24 नोम्बेबर 2007 नूं एंगदा लछमी बाख़लान (उरांव)
गुवाहाटी ता बेलतला नूं थोथा नान्जर,
आद ही इज्जत सांवसे ख़ेख़ेल नूं बीसियार,
आन्नु हूं असम सरकार मला भारत सरकार ST माल चिच्चा,
ईदि ती बग्गे आउर एकासे तेंग्गोन,
एन असम ता कुंड़ुख़ान।।

दव किचरी-डोड्डो माल कूरकन-पोजोरकन,
दव ओन्ना-मोख़ना माल ओण्डकन-मोक्कन,
बेमार बारि दव मंदर माल ख़इक्कन,
नेकन हूं माल तेंगेरकन,
एंगहय बई माल खोलोचकन,
छछेम रईह केरकन,
उरमिन सहचकन, जाकोन झेलेचकन,
एन असम ता कुंड़ुख़ान।।

*********************************************

~ Prabodh Toppo
NAGAON, ASSAM